Рубрика: Айар кут
Бу ый 31 күнүгэр диэри «Симэх» арт-солуоҥҥа (Аржаковв уул., 6) Марфа Степановна кэрэ оҥоһуктарынан толорбут быыстапкатын көрө, саҥа иэйиигэ уйдара кэлиҥ сылдьыҥ ыалдьыттааҥ!
Таатта Игидэйиттэн төрүттээх, Дьокуускай куорат олохтооҕо Федорова Марфа Степановна чөмчүүк тааһы оонньото, оҕуруо кистэлэҥ абылаҥар умсугуйа айар үлэтэ бочуоттаах сынньалаҥҥа тахсыаҕыттан арыллыбыта. Бу умсулҕаннаах дьарыкка кинини «Үһүс көлүөнэ» оскуола «Кабошон» куруһуогун салайааччыта Артамонова Нина Федоровна уһуйбута. «Оҕуруонан үлэ техникатын баһылаан, кистэлэҥин арыйан, айар-тутар үлэбин саҕалаабытым номнуо биэс сылын туолбут эбит» — диэн Марфа Степановна соһуйар. Онон сылыктаатахха талааны арыйарга, дьоҕуру сайыннарарга саас ырааппыт, бириэмэ куоппут диир табыллыбат курдук.
Киһи олоҕун тухары саҥаны билэ-көрө, солуну сэҥээрэ, бэйэни холоно сылдьара тоҕоостоох. Марфа Степановна үлэлэрэ ураты көстүүлээхтэр, туспа тыыннаахтар. Хас биирдии үлэ туһунан остуоруйа курдук кэпсэнэр, ырыа курдук ылланар. Күннээҕи киэргэл да курдук кэтэргэ, судургу оҥоһуктар, үөһэттэн этитиилээх харысхаллар, аныгылыы истииллээх, сахалыы оһуордаах үлэлэр араастара бааллар. Улахан урууларга, мааны биэчэрдэргэ биирдэ эмит кэтэр ураты көстүүлээх, суумкатыгар тиийэ кэмпилиэктэр кэллиэксийэни толорон, байытан биэрэллэр. «Миэстэ элбэҕэ буоллар, өссө да атын үлэлэрим туруохтара эбит, балай эмит үлэм дьон хараҕар көстүбэккэ хаалла» — диэн дьоруойбут үөрэ-сонньуйа кэпсиир.
Бэлэмнээтэ Афанасьева Екатерина
