Рубрика: Ийэ муннуга
Чурапчы улууһун Чакыр нэһилиэгэр “Тулуйхан” диэн доруобуйаларыгар хааччахтаах дьон түмсүүлэрин бэрэссэдээтэлинэн, уопсастыбанньык, “Матери России”, “Союз Женских Сил” (2021с) хамсааһыннар чилиэннэрин, “Волонтёр Победы”, “Якутия с тобой”, “Мы вместе” (2022с), “Серебренные волонтёры исторического парка” (2023с) волонтерун Лена Егоровна Адамованы билиһиннэриэхпитин баҕарабыт. Кини үтүө үлэтин иһин Ил Дархан А.С. Николевтан махтал суругунан наҕараадаламмыта.
Ону таһынан, улуус, өрөспүүбүлүкэ таһымнаах күрэстэргэ кыттан дьоһун ситиһиилэрдээх. Хатыҥнаах түөлбэтин 13 сыл салайбыта, оскуолаҕа төрөппүттэр кэмитиэттэригэр биэс сыл үлэлээбитэ. Волонтерунан үлэлиир кэмигэр ийэлэр, эбээлэр буолан мустан, байыаннай дьайыыга сылдьар эр дьоҥҥо төһөлөөх элбэх малы-салы, таҥаһы-сабы киччэллээхтик суулаан ыыппыттара буолуой? Ону тэҥэ маскировочнай сиэккэ оҥороллор, иистэнэллэр.
Лена Егоровна 2009 сылтан дьиэ кэргэнин кытта урбаанынан дьарыктанар. Оҕолорун, сиэттэрин тыа үлэтигэр сыһыарар, иллэҥ кэмнэригэр саахыматтыылларын, дуобаттыылларын сөбүлүүллэр.
