Рубрика: История араҥатын арыйан
60-с сылларга «Комсомольскай правда» хаһыакка Саха сиригэр Лабыҥкыр уонна Хайыр күөллэргэр наукаҕа биллибэтэх уу кыылын көрбүттэр диэн солун тахсан, аан дойдуну аймаабыт. Ол билигин үһүйээҥҥэ кубулуйан сылдьар. Лабыҥкыр күөл Өймөкөөн улууһугар баар. Оттон Хайыр — Уус-Янаҕа. Кыыл хайдах көстүбүтүн маннык кэпсээбиттэр: хас да дьиэ кэргэн табанан айаннаан иһэн мууска чубуку муоһун курдук туохтар эрэ быган сыталларын көрөн тохтообуттар. Кырдьаҕас өттө аньыыргаан кытылга таласпыт. Эдэр эр дьон кэрдэн ылаары сугэлэринэн охсуолаан эрдэхтэринэ, муус тоһутталанар тыаһа өрө барчалана түспүт даҕаны, дьон биирдэ муус анныгар баран хаалбыттар. Кытылга турбут дьон көрдөхтөрүнэ, сүүнэ улахан кыыл уһун ньалҕаархай моойун ууннаран, бэйэтигэр холооно суох кыра баһын көтөхпүт. Били, чубуку муоһа дии санаабыттара, арҕаһыгар тура сылдьар лапчааннара эбит. Кыыл сутүөн иннинэ, дьон кини хараҥа дьүһүннээх баараҕай таһаатын барык-сарыкка көрөн хаалбыттар. Ол ууга былдьаммыт дьонтон биир биһиктээх оҕо эрэ тыыннаах хаалбыт.
