Рубрика: История араҥатын арыйан
Балысхан үйэ төһө да дьэргэспит таас дьиэлэринэн, хардыы аайы маҕаһыыннарынан, бааннарынан туолан турдар, киһи эргэ куораппыт былыргы тутууларын ытыктыы көрөр. Мин олору атыы-эргиэн баннердарын, экраннарын быыстарыттан булан ылан кэпсэтээччибин, хаартыскаҕа түһэрээччибин. Бу, холобур, «Центральнай» киинэ тыйаатыра дойду ордук уустук кэмигэр, 1938 сыллаахха тутуута саҕаламмыт. Манна аан маҥнай таас атахха тутуу киирбит. Төһө да сэрии ыар сыллара турдаллар, 1942 сыллаахха тыйаатырга киирбиттэр. Икки саалалаах, киэҥ холлаах тыйаатырга, дьон санаатын көтөҕөр тэрээһиннэри ыытан, киинэлэри көрдөрөн абыраабыттара. Билигин да сэргэх. Кэрэ эйгэтин тарҕата турарын сырыы аайы ааһан иһэн хайҕаан, кытархай эркинин таптайан таптаан ааһабын.
