Рубрика: Сир уоҕа
Бу кэннэки кэмҥэ аллергия диэн тэппини көрбөт ыарыы дэлэйдэ. Мин онтон туораабатым, өр сылларга эрэйи көрдүм. Тугу эрэ сыыһа аһаатым, алҕас тутуннум да тохтоло суох ытырдан, сөтөллөн, хараҕым уута сүүрбүтүнэн барара. Ордук хамсык ыарыы кэнниттэн бэргээбитэ. Бу ааспыт күһүн ютуб ханаалга «Охотник саха» диэн саха киһитин булан көрдүм. Онно кини тэтиҥ мас субата киһи иһигэр баар микробтары өлөрөн, араас ыарыылартан бөҕөргөтүнэри сиһилии кэпсээбитэ. Уһата — тэнитэ барбакка, мас кэрдиллибит дэлээнэтиттэн тэтиҥ субатын хастаан киллэрэн, хатаран, бытарытан оргуйбут ууга туруоран испитинэн барбытым. Киһи сымыйарҕыах, нэдиэлэ курдугунан муннум чөллөрүйдэ, икки нэдиэлэнэн бэл сүтэн хаалбыт сыты ыларым кыралаан төннөн барда. Ый курдугунан түүҥҥү сөтөлум аҕырымнаата, тыынарым кэҥээтэ. Бу сыл аҥарыттан ордук иһэн түүн чарааһырарым кытта сүттэ, аллергиям аччаан, бурууктаны, оту-маһы, оҕуруот аһын барытын куттала суох сиир буоллум. Тэтиҥ субата, сэбирдэҕэ, үнүгэһэ барыта туһалаах. Ааҕыҥ, билсиҥ, туһаныҥ.
