Рубрика: Биир мал сэһэнэ
Бу кытаҕы хос эһэм Семен Григорьевич Павлов – Өгдөөн Сэмэн оҥорбут. Кини уһун уҥуохтаах, бөдөҥ-садаҥ, күүстээх-уохтаах киһи эбитэ үһү. Сунтаар улууһун Үөһээ Мэйик нэһилиэгин бастакы кинээһэ этэ. Трофим Васильевич Павлов – Тэрэппиин атыыһыт чугас аймаҕа буолан, Бүлүүчээн таҥаратын дьиэтин тутуутун салайбыт. Хордоҕойго кини аатынан Өгдөөн өтөҕө диэн баар. Кини улахан мас ууһа эбит. Кэлин кулаактанан бырааба быһыллыбыт.
Кытах харыйа төрдүттэн оҥоһуллубут, үрдүгэ 19 см, былаһа 148 см. Тиит хатырыгын уутунан сотуллубут, арыыламмыт. Быһа холоон XX үйэ саҕаланыыта оҥоһуллубут буолуон сөп. Кытаҕы сыл аайы сиир арыынан сотобун онтон фенынан үрдэрэ түһэбин. Оччоҕо арыытын оборон ылар, иҥэ түспүтүн кэннэ хаалбыт арыытын сотон ылабын. Арыынан сото олорон хос эһэбин кытта чугас буолар курдукпун. Хайдах, туох санаалаах олорон оҥорбута буолуой эҥин диэммин саныы-саныыбын сотооччубун. Манна киһи өбүгэ ситимэ баарын өйдүүр эбит. Ол курдук, өбүгэлэрбит тутта сылдьыбыт маллара-саллара көннөрү мал эрэ буолбакка, кимтэн кииннээхпитин, хантан хааннаахпытын умнубаппыт туһугар иитэр-үөрэтэр аналлаахтар дии саныыбын. Бу кытаҕы оҕо эрдэхпиттэн көрөн улааппытым. Билигин да Өгдөөн Сэмэн сыдьааннара билэ-көрө сырыттыннар диэн саамай көстөр сиргэ дьоһуннук хараллан турар.
Суруйда хос сиэнэ Айсен Павлов.
