Рубрика: Биир мал сэһэнэ
Билигин атах таҥаһын эгэлгэтэ элбэх. Оттон тымныы дойдулаах сахаларга атах таҥаһа туохтааҕар да күндү. Этэрбэһи тигэр иистэнньэҥ туспа, ураты идэлээх киһиэхэ киирсэрэ уонна балачча кыахтаахтык олороро. Этэрбэс араас тирииттэн тигиллэр. Ордук күндүлэрэ буруоҕа ыыһаммыт хара түнэ саары этэрбэс буолар. Маннык этэрбэс элбэх үлэттэн тахсар. Үчүгэй маастар тигиитэ ханнык да билиҥҥи уу саппыкытыттан итэҕэһэ суох, ууну, быылы бэккэ тутар. Анаан бэлэмнэммит иэн иҥиир сабы тутталлара. Ол сап илийдэҕинэ үллэн, ууну бычыгыраппат буолар. Өссө быыһыгар бөҕөргөтөн кыбытыы киллэһиктээн биэрэллэрэ. Этэрбэс билэтэ — бөлтөркөй тимир тимэхтэринэн оҕуруо кылдьыылаан, үгэһи тутуһан оһуорданара. Үксүн сири-буору кытары ситимнээн от-мас оһуорун анньаллара. Ол эбэтэр ийэ буор, от-мас, айылҕа иччилэрэ кэрэттэн үөрэн, үчүгэйи тосхойуохтаахтар диэн. Аны оҕуруо кылдьыы дьураатын силбэһиннэриэ суохтааххын. Силбэһиннэрбит иистэнньэҥ бэйэтин ииһин суолун бүөлээн, ииһи тутарын кэҕиннэрбит диэн буолар.
