Саха сиригэр 2024 сылга дьиэ кэргэни уонна оҕо аймаҕы өйүүр социальнай миэрэлэргэ уларыйыылар киирдилэр.
«Дьиэ кэргэн» өрөспүүбүлүкэтээҕи ийэ хапытаалын кээмэйэ тохсунньу 1 күнүттэн икки төгүл улаатыннарыллан, 300 тыһ. солк. тэҥнэстэ. Быйыл хапытаалы туһаныы быраабылатыгар бэрт туһалаах хайысханы киллэрдилэр – дьиэ кэргэн бу үбүнэн учаастак ылыан сөп буолла. Санатар буоллахха, бу социальнай миэрэ үһүс уонна онтон элбэх оҕо төрөөтөҕүнэ көрүллэр.
Тохсунньу ыйтан эдэр дьиэ кэргэни өйүүр саҥа көмө олоххо киирдэ. Ол курдук, 25 саастарыгар диэри сүрэхтэрин холбообут эдэр дьоҥҥо 50 тыһ. солк. бэриллэр. Маныаха кинилэр аан бастаан сокуонунан ыал буолбуттара ирдэнэр.
Анал байыаннай дьайыы кыттыылааҕар уонна кини дьиэ кэргэнигэр дьиэ хапытаалынай өрөмүөнүн усунуоһугар уонна одькх кэккэ өҥөтүгэр 50 бырыһыаннаах чэпчэтии көрүллэр.
Маны таһынан 2024 сылтан оҕоҕо төлөнөр босуобуйа кээмэйэ улаатта:
– Дьиэ кэргэҥҥэ бастакы оҕо төрөөтөҕүнэ бэриллэр биир кэмнээх төлөбүр I түөлбэ улуустарыгар 55 694 солкуобай, II түөлбэ улуустарыгар 46650 солкуобайга диэри улаатта.
– Үһүс уонна онтон үөһээ төрөөбүт оҕоҕо ыйдааҕы босуобуйа I түөлбэ улуустарыгар 27 847 солкуобай, II түөлбэ улуустарыгар 23 325 солкуобайга диэри улаатта.
– Элбэх оҕолоох уонна кыаммат дьиэ кэргэҥҥэ оскуолаҕа ороскуоттарын толуйуу 4 302 солкуобайга диэри улаатта.
– «Сүүс сыл оҕолоро» хапытаал 110 775 солкуобай буолла.
