Рубрика: сонун
Тохсунньу 24 күнүгэр Юрий Гагарин аатынан култуура киинигэр, ааспыт Үлэ сылын түмүктүүр уонна саҥа үүммүт Оҕо-аймах сылын арыйар үөрүүлээх тэрээһин буолан ааста. Манна ааспыт сылга ситиһиилээхтик үлэлээбит тэрилтэлэри, дьону наҕараадалаатылар.
Тэрээһини СР Бырабыыталыстыбатын бэрэссэдээтэлин солбуйааччы Георгий Михайлович Степанов арыйда: “Убаастабыллаах бар дьонум, Ил Дархан уонна Бырабыыталыстыба аатыттан бу үөрүүлээх күнүнэн итиитик-истиҥник эҕэрдэлиирбин көҥүллээҥ. Ааспыт 2023 Үлэ сыла буолан үгүс үлэ, элбэх тэрээһин ыытылынна. Оттон дойду үрдүнэн Педагог уонна настаабынньык сыла этэ. Үлэ сыла манан түмүктэммэт. Ил Дархан Айсен Сергеевич Николаев ааспыт сылга, бэйэлэрин идэлэригэр бастыҥ үлэлээх дьоҥҥо 300 тыһ солк суумалаах 50 бириэмийэни олохтообута. Ол курдук, бу саалаҕа бастакы лауреаттарга бириэмийэлэри туттарбыта. Онно бу бириэмийэ сыл аайы туттарыллар буолуоҕа диэн эппитэ. Ааспыт сыл ахсынньытыгар өрөспүүбүлүкэтээҕи клиническэй балыыһа үлэһитэ Алквиад Иванович Иванов, доруобуйа харыстабылын үлэһиттэрин бүтүн Арассыыйатааҕы куонкуруһугар, “За преданность профессии” диэн номинацияҕа кыайбыта. Ону таһынан, икки күн анараа өттүгэр дойдубут бэрэсидьиэнэ Владимир Владимирович Путин элбэх оҕолооох дьиэ кэргэни өйүүр миэрэлэр туһунан ыйаахха илии баттаабыта”, – диэн эттэ уонна ааспыт Үлэ сылын ситиһиилээхтик ыыппыт үлэ кэллэктииптэригэр, Үлэ уонна социальнай сайдыы министиэристибэтигэр, тэрилтэлэргэ улахан махталын тиэртэ.
Салгыы муниципальнай оройуоннар, куораттааҕы уокуруктар, тэрилтэлэр икки ардыларыгар Үлэ сылын ыытыыга өрөспүүбүлүкэтээҕи куонкурус бастыҥнарын наҕараадалааһын буолла. Ол курдук, муниципальнай оройуоннарга бастакы миэстэни Мииринэй (баһылык А.В. Басыров) ылла, иккис – Алдан оройуона (баһылык А.В. Шестопалов) уонна бочуоттаах үһүс миэстэни Амма улууһа ылла (баһылык С.Н. Кузьмин).
Оттон тэрилтэлэр икки ардыларыгар СР ГАУ “Якутская офтальмологическая клиническая больница” (сүрүн быраас И.П. Луцкан) бастаата, иккис СР ГАУ М.Е. Николаев аатынан Национальнай мэдэссиинэ киинэ (дириэктэр С.Н. Жирков) буолла уонна үһүс миэстэни “Якутский хлебокомбинат” акционернай уопсастыба (дириэктэр С.Т. Кынакытова) ылла.
Түмүккэ 2024 – Оҕо-аймах сылын бэлиэтин СР Үөрэх уонна наука миниистиригэр Нюргуна Афанасьевна Соколоваҕа, оттон ааспыт 2023 – Үлэ сылын бэлиэтин СР Үлэ уонна социальнай сайдыы миниистиригэр Елена Александровна Волковаҕа туттардылар.
